نواز شریف کو کھری کھری سنادی
نواز شریف ڈرپوک اور آرام پسند ہیں۔۔۔وہ کبھی واپس نہیں آئینگے،عمران خان نے نواز شریف کو کھری کھری سنادی
اسلام آباد(ویب ڈیسک) پاکستان تحریک انصاف کے چیئرمین عمران خان نے مسلم لیگ ن کے قائد نواز شریف کو ڈر پوک اور آرام پسند شخص قرار دیتے ہوئے دعویٰ کیا ہے کہ وہ وطن واپس نہیں آئیں گے۔ عمران خان نے 25 ستمبر کو ہونے والے قومی اسمبلی کی تمام 9 نشستوں پر خود ضمنی انتخاب لڑنے کا فیصلہ کیا ہے۔ اس حوالے سے چیئرمین تحریک انصاف عمران خان کہتے ہیں کہ مجھے نااہلی کا ڈر نہیں ہے کیونکہ تحریک انصاف نے قانونی طریقے سے فنڈ اکٹھا کیا ہے۔ سابق وزیراعظم نے یہ دعویٰ بھی کیا کہ لانگ مارچ کے دوران ہمیں انتخابات کے حوالے سے غلط یقین دہانی کرائی گئی تھی۔ مسلم لیگ ن کے قائد کی وطن واپسی کے حوالے سے گفتگو کرتے ہوئے چیئرمین تحریک انصاف نے کہا کہ نواز شریف ڈرپوک اور آرام پسند آدمی ہیں، واپس نہیں آئيں گے۔ یاد رہے کہ گزشتہ روز لندن میں نواز شریف سے ملاقات کے بعد میڈیا سے گفتگو کرتے ہوئے وفاقی وزیر میاں جاوید لطیف نے کہا تھا کہ نواز شریف کو بہت جلد پاکستان کے عوام کی خدمت کرتا دیکھ رہا ہوں۔دوسری جانب سابق وزیراعظم و پاکستان تحریک انصاف کے چیئرمین عمران خان نے قومی اسمبلی کے 9 حلقوں سے خود ضمنی انتخابات لڑنے کا فیصلہ کرلیا۔ الیکشن کمیشن نے قومی اسمبلی کی 9 نشستوں پر ضمنی انتخابات کا اعلان کردیا ہے اور ان 9 حلقوں میں ضمنی الیکشن 25ستمبر کو ہوں گے۔ ذرائع کے مطابق عمران خان نے قومی اسمبلی کے ان 9 حلقوں سے خود ضمنی الیکشن لڑنے کا فیصلہ کیا ہے۔ خیال رہے کہ گزشتہ دنوں تحریک انصاف کے 9 ارکان قومی اسمبلی کے استعفے منظور ہوئے تھے جس کے بعد آج الیکشن کمیشن نے ان 9 حلقوں کے ضمنی انتخابات کا شیڈول جاری کیا ہے۔ ضمنی انتخاب این اے 22 مردان 3 ، این اے24چارسدہ 2، این اے 31پشاور5 ، این اے 45کرم 1، این اے 108 فیصل آباد، این اے 118 ننکانہ صاحب 2، این اے 237 ملیر 2، این اے 239 کراچی 1 اور این اے 246 کراچی جنوبی 1 میں ہوگا۔
