عمران خان سے پارٹی عہدے سے مستعفی
مریم اورنگزیب کا عمران خان سے پارٹی عہدے سے مستعفی ہونے کا مطالبہ
عمران خان جھوٹے اور جعلساز ہیں جس پر الیکشن کمیشن نے مہر لگا دی ہے،وفاقی حکومت قانون کے مطابق فیصلے پر عملدرآمد کرے گی،وفاقی وزیر اطلاعات
اسلام آباد ( 02 اگست 2022ء ) تحریک انصاف کیخلاف ممنوعہ فنڈنگ کیس کا فیصلہ،وزیر اطلاعات مریم اورنگزیب نے سابق وزیر اعظم عمران خان سے پارٹی چیئرمین کے عہدے سے استعفٰی دینے کا مطالبہ کردیا۔ انہوں نے کہا کہ الیکشن کمیشن کا فیصلہ عمران خان کے خلاف جرائم کی تصدیق ہے۔ عمران خان نے اسرائیل، بھارت، امریکا،اور کینیڈا سمیت دیگر ملکوں سے فارن فنڈنگ لی اور پاکستان میں فتنہ برپا کیا۔عمران خان نے جانتے بوجھتے ہوئے 351 غیرملکی کمپنیوں اور 34 غیرملکیوں سے فارن فنڈنگ لی۔ جبکہ جعلی اور جھوٹے بیان حلفی جمع کرائے۔ میڈیا رپورٹس کے مطابق مریم اورنگزیب نے اپنے بیان میں کہا کہ 13 غیرقانونی بینک اکاؤنٹس عمران خان خود چلاتا رہا اور انہیں الیکشن کمیشن سے چھپاتا رہا ۔عالمی فراڈیوں سے خیرات کے نام پر پیسے بٹورے اور جعلسازی کی ۔فارن فنڈنگ،منی لانڈرر آخر 8 سال بعد پکڑا گیا۔ عمران خان صادق اور امین نہیں رہے،اس لئے پارٹی چیئرمین کے عہدے سے فوری استعفٰی دیں۔ انکا کہنا تھا کہ عمران خان پاکستان کے خلاف غیر ملکی سازشی منصوبہ تھا اور ہے ۔ عمران خان جھوٹا اور جعلساز ہے جس پر الیکشن کمیشن نے مہر لگا دی ہے۔ وزیر اطلاعات نے مزید کہا کہ چوروں اور منی لانڈرز نے وکیل بدلے، الیکشن کمیشن سے بھاگے اور کئی مرتبہ کیس کو روکنے کی کوششیں کیں۔عمران خان عالمی منی لانڈرر ثابت ہو چکا ہے۔ وفاقی حکومت قانون کے مطابق الیکشن کمیشن کے فیصلے پر عمل درآمد کرے گی۔ عمران خان اس چوری کی وجہ سے الیکشن کمیشن پر حملے کر رہا ہے۔ واضح رہے کہ اس سے پہلے الیکشن کمیشن نے پی ٹی آئی ممنوعہ فنڈنگ کیس کا فیصلہ سنایا، تین رکنی بینچ کی طرف سے متفقہ فیصلہ سنایا گیا، کیس میں تحریک انصاف کے خلاف ممنوعہ فنڈنگ کا الزام ثابت ہوگیا ، جس کی بنیاد پر الیکشن کمیشن نے شوکاز نوٹس جاری کردیا۔ اپنے فیصلے میں الیکشن کمیشن کی جانب سے کہا گیا ہے کہ تحریک انصاف نے ممنوعہ فنڈز لیے ہیں۔غیرملکی فنڈنگ میں 34 غیرملکیوں سے فنڈز لیے گئے، اس دوران 13 نامعلوم اکاؤنٹ سامنے آئے۔
